აზერბაიჯანმა გარეჯში მესაზღვრეები დაამატა და მიმდებარედ ახალი ბაზები გახსნა, ჩვენი მთავრობა კი დუმს და “სტრატეგიულ” სიმშვიდეს ინარჩუნებს

დავით ქაცარავა “ფეისბუქის” პირად გვერდზე წერს:

გარეჯი. 22.07.2019
14 ივლისის ინციდენტის შემდეგ გავიდა 8 დღე.
გარეჯი დაგვიკეტეს. ჩიჩხიტური, აღდგომის ტაძარი, უდაბნოს მონასტერი. გაივსო ქედი აზერბაიჯანელი მესაზღვრეებით. ჩვენი მესაზღვრეები 10 ჯერ ნაკლები არიან. ისინი უკვე გვიკეტავენ მისასვლელს ქვედა ნაწილში, ალბათ რომ არ დავიღალოთ და ეს რთული გზა ტყუილად არ გავიაროთ.
იყო დაპირება, რომ მაქსიმუმ 1 კვირაში გაიხსნებოდა გარეჯის ყველა მიმართულება. 
ამის ნაცვლად ვხედავთ ახალ სამხედრო ბაზას, რომელიც აზერბაიჯანულმა მხარემ სასწრაფოდ ააშენა გარეჯის მთის ძირში და გაავსო ჯარისკაცებით. 
დღეს ჩვენც დაგვემუქრნენ, თუ არ შევწყვეტდით დრონით ფრენას, ჩამოგვიგდებენ. არ მოგეჩვენათ, დიახ, ჩამოგვიგდებენ ჩვენივე საზღვრებში.
აღარ დავიწყებ იმ განცხადებების ჩამოთვლას, რომლებსაც აზერბაიჯანული ოფიციალური პირები ფაქტიურად ყოველდღიურ რეჟიმში აკეთებენ იმის თაობაზე, რომ გარეჯი აზერბაიჯანის ტერიტორიაა. ეს კეთდება იმ დროს, როდესაც ნომინალურად დელიმიტაციის კომისიას არ დაუსრულებია მუშაობა. 
ჩვენი კომისია კი დუმს. საერთოდ არაფერს ამბობს. მინდა მჯეროდეს, რომ როცა ამოიღებენ ხმას ამ კომისიის წევრები, გვახარებენ რომ არაფერი დავთმეთ და შევინარჩუნეთ გარეჯი. 
მაგრამ ამჯერად სიტუაცია სხვას გვეუბნება. 
გარეჯი დაკეტილია და ალბათ აღარც გაიხსნება. 
ჩვენ კი ნელ-ნელა გვაჩვევენ იმ აზრს, რომ გარეჯი ჩვენი აღარ იქნება.
გაზიარება: